Hraunvallaskóli

Skólavikan að þessu sinni er ekki nema þrír dagar fyrir nemendur en fimmtudagurinn 17. maí er uppstigningardagur og föstudagurinn 18. maí er skipulagsdagur kennara. Nemendur mæta því bara í skólann mánudaginn 14. maí, þriðjudaginn 15. maí og miðvikudaginn 16. maí þessa vikuna.

Hraunvallaskóli auglýsir eftir tveimur foreldrum til að starfa í stýrihóp verkefnisins „Heilsueflandi grunnskóli“ en Hraunvallaskóli tók formlega við verkefninu ”Heilsueflandi grunnskóli” í vetur. Í verkefninu felst að vinna að betri heilsu og vellíðan nemenda og starfsfólks. Við skólann hefur verið starfandi teymi til undirbúnings fyrir verkefnið en mikilvægt er að sem flestir sem tengjast skólanum vinni saman að verkefninu og myndi þannig stýrihóp, átta til tíu manns. Ráðgert er að stýrihópurinn fundi að jafnaði einu sinni í mánuði yfir vetrartímann og hittist í fyrsta sinn nú fyrir skólalok. Þeir sem hafa áhuga vinsamlegast hafið samband við skrifstofu skólans.

Við minnum nemendur á að skila bókum á bókasafnið.  Það væri mjög gott ef allar bækur væru komnar á safnið í síðasta lagi 25. maí en eftir 16. maí er ekki lengur hægt að fá lánaðar bækur heim.

Úrslitakeppni Skólaþríþrautar FRÍ fór fram laugardaginn 5. maí síðastliðinn í Laugardalshöll. Keppendur voru 73 talsins frá 19 skólum af landinu. Auk verðlauna fyrir besta árangur í þríþraut voru veitt sérstök verðlaun fyrir besta árangur í hverri grein og þá voru stigahæstu skólum í hverjum flokki veitt verðlaun. Hraunvallaskóli átti einn fulltrúa í keppninni, Guðbjörgu Bjarkadóttur í 7. ÞJ og er skemmst frá því að segja að hún náði 1. sæti í sínu flokki með því ná 2507 stigum samanlagt. Úrslit í skólaþríþrautinn er hægt að sjá hér, á mótaforriti FRÍ.

Hæfileikakeppni miðstigsins fór fram í gær en þá var mikið fjör þegar óvenju fjölbreytt atriði voru sýnd. Anna Sara, Friðbjörg, Kristín og Stefanía nemendur í 6.bekk fengu verðlaun fyrir frumlegasta atriðið en þær voru með tónlistaratriði. Í fyrsta sæti voru Anna Sara og Jón Valgeir með glæsilegt dansatriði, í öðru sæti var Albert en hann spilaði á bassa og í þriðja sæti voru brandarakarlarnir Brynjar Daði og Patrik Uni. Það er gaman að sjá hversu hæfileikaríkir nemendur eru í Hraunvallaskóla en alls voru 24 atriði sýnd. Við óskum öllum sem tóku þátt í keppninni til hamingju með glæsilegan árangur!